
遍知贝玛嘎波大师教言集PK30རྒྱལ་བྱེད་ཚལ་གྱི་གཙུག་ལག་ཁང་བཞེངས་ཚུལ་གྱི་དཀར་ཆག་བཞུགསོ།།
4-276
༄༅། །རྒྱལ་བྱེད་ཚལ་གྱི་གཙུག་ལག་ཁང་བཞེངས་ཚུལ་གྱི་དཀར་ཆག་བཞུགསོ།།
༄༅། །རྒྱལ་བྱེད་ཚལ་གྱི་གཙུག་ལག་ཁང་བཞེངས་ཚུལ་གྱི་དཀར་ཆག་བཞུགསོ།། ༄༅།།ཤྲེ་ཡ་སེསྟུ། གང་ཞིག་འཇིག་རྟེན་ཁམས་སུ་ཕན་བདེའི་ཆེད། །དམ་ཆོས་གསེར་གྱི་འཁོར་ལོ་ལེགས་བསྒྱུར་བས། །མཐའ་བཞི་རྣམ་མནན་ཆོས་ཀྱི་རྒྱལ་པོའི་སྡེ། །སྙན་པ་འབྲུག་ལྟར་ཆེ་བ་ཀུན་ལ་འདུད།༡ །ཨེ་མ། ས་དབང་ཧོར་ཚེ་དད་པའི་ནམ་དུས་ཀྱིས། །ཤར་ཁའི་རྒྱལ་ཁམས་སྐྱིད་པའི་མཚོ་དབུས་སུ། །དཔལ་ལྡན་པདཀར་བོས་པས་དེའི་མདུན་ངོར། །དགེ་ལེགས་དྲི་བཞོན་ཐམས་ཅད་ཚོགས་པ་སྙམ།༢།ཚོགས་གཉིས་ཟོང་གིས་ལྔ་བརྒྱ་ཐ་མའི་སྲང་། །རྣམ་ཐོས་སྲས་ཀྱི་བང་མཛོད་དུ་བསྒྲུབ་པའི། །ཆོ་ག་མཁན་དེ་དོན་རྣམས་ཀུན་གྲུབ་པ། །དེད་དཔོན་ཆེན་པོའི་མེ་ལོང་ཅིས་མ་ཡིན།༣།མཉན་དུ་ཡོད་པར་མངོན་བྱུང་དེ་ཇི་ལྟ། །འདིར་འོངས་གཟིགས་ནས་ཀུན་དགའི་བློ་གྲོས་ཀྱིས། །རྒྱལ་བྱེད་ཚལ་ཞེས་མིང་དུ་བཏགས་པས་དེ། །གྲུབ་པའི་ས་ལ་བཞུགས་པར་སོམ་མི་ཉི།༤།གདེངས་ཅན་དབང་པོའི་ཚིག་གིས་གཞི་བྱིན་ཅིང་། །ལེགས་ལྡན་ཕོ་ཉས་ཆེད་དུ་བསྐུལ་བས་སུ། །བློ་གསལ་ཁོ་བོ་འདིར་དོན་བསྒྲུབ་པ་ལ། །དམ་བཅའ་རྡོ་ལ་བྲིས་ལྟར་བརྟན་པར་བྱས།༥།དེ་འདྲའི་ངོ་མཚར་ལ་རངས་དབང་ཕྱུག་གི། །འབྱོར་པའི་སྡེ་ཀུན་གྲོགས་སུ་ཆས་གྱུར་པས། །ཡིད་ལ་བསམས་པ་མོད་ལ་གྲུབ་པའི་ཚེ། །
4-277
བསམ་གཏན་ལྷས་ཀྱང་ཁེངས་པ་བསྟུངས་པར་གྱུར།༦།གསེར་གྱི་རྒྱ་ཕུབས་ཡིད་འོང་དྲ་མིག་ཅན། །གཙང་ཁང་གློ་འབུར་གསུམ་ལྡན་འདུ་བའི་ཁྱམས། །སྒོ་ཁང་འཕར་མ་དང་ལྡན་འཁོར་སར་བཅས། །ཁང་མིག་དགའ་ལྡན་ལྷ་ཡུལ་མཚོན་པའི་དཔེ།༧ །དབང་པོའི་གཞུ་ནི་དེ་ཡི་ཚོན་ཉིད་དང་། །བཟང་པོའི་སྒྱུ་མ་ཐམས་ཅད་རི་མོ་དང་། །ནོར་བུ་རྩིག་པ་སྣ་ཚོགས་བཟོའི་ལག་རྩེར། །ཆགས་པའི་བཟོ་ཁྱད་ཐམས་ཅད་འདུས་པ་ཉིད།༨ ། དབུས་མར་རྟེན་ཆེན་ཁྲིར་མཛེས་ཟས་གཙང་སྲས། །ལྷུན་པོའི་བྱིན་གྱིས་ནམ་ཡང་མི་མཚོན་དང་། །ལེགས་བསུངས་འགྱུར་ཏོ་མཐིང་ཤོག་གསེར་ཞུན་གྱིས། །བྲིས་པ་བློ་གསལ་སྙིང་ག་མཚར་གྱིས་བཀང་། ༩། ནུབ་མར་འཕགས་མཆོག་བཅུ་གཅིག་ཞལ་རྟེན་ཆེན། །ཆོས་ཀྱི་རྒྱལ་པོའི་ལུགས་དང་གསེར་སྐུའི་སྡེ། །ཤར་མར་བདུད་ཀྱི་གཤེད་མ་མགོན་པོའི་ཚོགས། །མཐུ་སྟོབས་ནུས་པའི་གཏེར་རྣམས་འཁོད་པའོ།༡༠། སྟེང་དབུས་ཆོས་རྗེ་བྱིན་རླབས་གཟི་འོད་འབར། །དཀར་རྒྱུད་གནས་བརྟན་ཡ་མཚན་བཟོའི་ཁྱད་པར། །འདི་དང་མཉམ་པའི་རེ་བྲལ་ཆ་ཙམ་ཡང་། །གངས་ཅན་ལྗོངས་ན་སྒྲོན་མེས་བཙལ་ཡང་ཅི།༡༡།ནུབ་ཕྱོགས་རྒྱལ་ཚབ་བྱམས་པ་ཟི་ཁྱིམ་སྐུ། །ཚད་ལྡན་མི་གཟུགས་དང་མཉམ་གཞན་རྒྱ་གར། །རྒྱ་ནག་ལི་བོད་ཡུ་གུར་ཧོར་སོགས་ཀྱི། །ལི་མའི་ལྷ་ཚོགས་ཁྱད་འཐོན་དག་གིས་གང་།༡༢ །དེ་དག་མཐོང་བའི་མོད་ལ་སྡིག་པའི་གངས། །
4-278
མ་ལུས་ཞུ་ནས་ས་ལ་ཐིམ་གྱུར་པས། །འདི་ཅི་ཉིན་མོར་བྱེད་པ་གསར་པ་ཞེས། །མཐོང་ཐོས་དྲན་པའི་པདྨོ་མཚར་དུ་དགོད།༡༣།དེ་འདྲའི་གཙུག་ལག་ཁང་པ་ཀུན་གྱི་མཁའ། །ཀུན་བཟང་མཆོད་པའི་སྤྲིན་ཕུང་འཁྲིགས་བ་འདི། །ཆོས་ཀྱི་སྙེད་པ་ཁོ་ནས་སྦྱར་དེས་ན། །སངས་རྒྱས་བསྟན་ལ་བྱ་བ་ཅིས་མ་བྱས།༡༤། གང་དུ་མདོ་སྔགས་བཤད་པའི་གྲྭ་བཙུགས་ཤིང་། །དགེ་འདུན་མཐུན་བསྡུས་འབྱོར་པ་བསྟབས་པ་འདིར། །བདུད་དང་བདུད་ཕྱོགས་སྙིང་གཞག་གནོད་བསམ་ཀྱང་། །སྔགས་རྒྱ་ཏིང་འཛིན་འཕྲུལ་གྱིས་རེ་བ་འབྲལ།༡༥།ངག་གི་དབང་ཕྱག་ཀུན་གྱི་ནོར་བུ་དེའི། །མཐུ་ཆེན་འདི་ན་བསྟན་བཞིན་ཕྱོགས་མང་པོར། །བསོད་ནམས་གཞི་ལ་ཞུགས་པ་བློར་འབྱུང་བའི། །དྲང་པོའི་མིག་ལྡན་དིང་སང་འཇིག་རྟེན་དཀོན།༡༦།གང་གི་ཆེད་བཏང་དངོས་པོའི་མིང་ཙམ་ཡང་། །གཞན་ངོར་བསྒྲགས་ན་ཧ་འགལ་འགྱུར་བ་ནི། །ཕལ་མོར་མི་ཐོག་མང་པོའི་སུག་ལས་ཀུན། །ལོ་ལྔའི་རིང་ཚར་འཕྲུལ་འདི་བརྟགས་པས་ཤེས།༡༧།བལ་པོ་དབུས་པ་གཉལ་དང་གཙང་སྟོད་འདིའི། །བཟོ་སྦྱངས་བརྒྱར་ཉེ་མཐུན་པའི་འབབ་སྟེགས་སུ། །ནོར་འཛིན་བདག་པོ་བསོད་ནམས་དཔལ་འཕེལ་སོགས། །མང་པོས་འབྱོར་པའི་ཆུ་ཀླུང་ཅི་ཡང་ཕབ།༡༨།ཤར་ཁའི་ལྗོངས་གནས་དད་པའི་ཚོ་རིས་ཅན། །ཅི་ཡང་འཁྲིགས་ཤིང་དཔལ་ལྡན་འབྲུག་པའི་དབྱངས། །སྙན་པའི་རྗེས་འགྲོ་སློབ་མའི་སྣང་བའི་མཐུ། །མང་པོས་འབད་པ་དོམས་ལ་འདྲོན་པ་སུ།
4-279
༡༩།གང་དུ་ལན་བདུན་རབ་ཏུ་གནས་གྲུབ་ཅིང་། །དགའ་སྟོན་མཆོག་གིས་རིག་བྱེད་པ་མགུ་བ། །དེ་ལྟ་ཆོས་འཁོར་གཉིས་བྱུང་དང་མཚུངས་སྙན། །སྙན་པའི་སྒྲ་དབྱངས་ས་གསུམ་སྤྲིན་གྱིས་བསྒྲགས།༢༠།གནས་བརྟན་ཆེན་པོ་བཅུ་དྲུག་གཟུགས་གཞན་གྱིས། །འདིར་འབྱོན་ཕྱོགས་བཅུའི་རྒྱལ་བས་དགོངས་འགྱུར་བས། །བདག་ནི་སྐྱེ་དང་སྐྱེ་བར་དགེ་ལེགས་ཀྱི། །རི་མོ་འདྲི་ལ་ད་དུང་ངོམ་མ་ཡིན།༢༡།འདི་འདྲར་འབད་པ་རྡུལ་གྲངས་དེ་སྙེད་ཀྱིས། །གནས་སྐབས་འཁོར་ལོ་སྒྱུར་བར་སྐྱེ་བ་དང་། །ཕ་རོལ་བསྔོ་བས་ལེགས་ཟིན་སངས་རྒྱས་སུ། །འགྱུར་ཞེས་བརྫུན་མི་མངའ་བའི་སངས་རྒྱས་གསུངས།༢༢ །བསྟན་པའི་སྦྱིན་བདག་ཆེན་པོ་འབྲོང་རྩེ་བའི། །ཆབ་སྲིད་དབྱར་ཀའི་མཚོ་ལྟར་འཕེལ་འགྱུར་ཞིང་། །གཞན་ཡང་འདི་ལ་བསྙེན་བཀུར་བྱེད་པའི་མིའི། །འདོད་དོན་དཔག་བསམ་ལ་བཏུད་བཞིན་འགྲུབ་ཤོག།༢༣།གང་དུ་བློ་གསལ་ཐམས་ཅད་ལེགས་འདུས་ནས། །མདོ་སྔགས་བསྟན་པ་ཇི་བཞིན་ཉན་དང་སྤེལ། །སྒོམ་བྱུང་ཟབ་མོའི་དོན་ལ་མཉམ་གཞག་པ། །བསྟན་པ་ཇི་སྲིད་གནས་འདིར་འབྱུང་གྱུར་ཅིག ༢༤ །ཆོས་ཀྱི་རྒྱལ་པོའི་དཀྱིལ་གྱི་ལུང་རིགས་དཔྱིད། །ལེགས་བཤད་བསམ་འཕེལ་འདིར་བསྒྲུབས་དེ་ཡིས་སུ། །རྟག་ཏུ་འཇིག་རྟེན་ཀུན་ལ་སྐྱིད་པའི་དཔལ། །ཅི་ཡང་སྲིད་པའི་བར་དུ་འགྱེད་གྱུར་ཅིག །སྙན་དངགས་མཁན་གྱི་དབང་པོ་པདྨ་དཀར་པོ་ཉིད་ཀྱིས་སྦྱར་བའོ།། སརྦ་མདྒལཾ༎ ༎


目录
རྒྱལ་བྱེད་ཚལ་གྱི་གཙུག་ལག་ཁང་བཞེངས་ཚུལ་གྱི་དཀར་ཆག་བཞུགསོ།།